Sentyabrın 26-da Bakıda, Heydər Əliyev Mərkəzində məşhur fransız rəssamı Bernar Buffenin fərdi sərgisinin açılış mərasimi olub.

Heydər Əliyev Fondunun vitse-prezidenti Leyla Əliyeva və Arzu Əliyeva açılış mərasimində iştirak ediblər.

Mərasimdə çıxış edən Heydər Əliyev Mərkəzinin direktoru Anar Ələkbərov sərgi haqqında məlumat verib. Layihənin ərsəyə gəlməsində böyük zəhməti olan Heydər Əliyev Mərkəzinin və London Opera Qalereyasının kollektivlərinə minnətdarlığını bildirən Anar Ələkbərov layihənin ideya müəllifinin Leyla Əliyeva olduğunu söyləyob.

Leyla Əliyeva mərasimdə çıxış edib: “Əziz dostlar! Mən sizin hamınızı Bakıda, Heydər Əliyev Mərkəzində fransız rəssamı Bernar Buffenin sərgisinin açılışında görməkdən çox şadam. Yəqin ki, sizlərdən çoxunuz artıq onun yaradıcılığı ilə tanışsınız, lakin çoxunuz da onun haqqında bu gün ilk dəfə öyrənəcəksiniz. Mən birinci dəfə Buffenin yaradıcılığı ilə iki il bundan əvvəl tanış oldum və ilk baxışdan onun əsərlərinə vuruldum. Mənim üçün onun əsərləri emosiya, hisslər və dərinliklə doludur. Hətta onun ən kədərli və tünd çalarlı əsərləri yenə də müsbət enerji verir və əhval-ruhiyyəni yüksəldir.

Buffe yaradıcılığı boyu 12 mindən çox əsər yaradıb. Çox parlaq, dramatik, maraqlı həyat yaşamasına baxmayaraq, o, demək olar ki, unudulub. Əminəm ki, bugünkü sərgi vasitəsilə xeyli insan bu böyük rəssam haqqında məlumat əldə edə biləcək”.

Sərginin açılışında dünyanın bir çox şəhərlərindən qonaqların iştirak etdiyini deyən Leyla Əliyeva çıxışını belə davam etdirib: “Əksəriyyətiniz Azərbaycanda çox olmusunuz, bəzilərinizin isə ölkəmizə ilk səfəridir. Lakin hər birinizin ölkəmizin tarixi, mədəniyyəti, təbiəti, memarlığı haqqında kəşf edəcəyi çox şey var. Fərqli mədəniyyətlərin, dinlərin, ənənələrin kombinasiyası hər zaman bizə yeni yaradıcı ideyalar bəxş edir. Fürsətdən istifadə edərək mən noyabr ayında Londonda həyata keçiriləcək növbəti layihəmizin anonsunu vermək istəyirəm. Həmin sərgidə məşhur rəssamların əsərləri nümayiş olunacaq.

Zənnimcə, ən qüdrətli incəsənət bu günün meyllərini izləmək deyil, səmimi və dərin əsərlər yaratmaqla zamanın sınağından keçməkdir. Məncə, Buffe rəssam kimi buna nail olub”.

London Opera Qalereyasının direktoru Jan-David Malatın da çıxışından sonra tədbir iştirakçıları sərgi ilə tanış olublar.

Rəssamın Bakıdakı ilk fərdi sərgisində 43 əsəri nümayiş olunur. Onların sırasında müəllifin “Sirk”, “Dantenin cəhənnəmi”, “Dərisi soyulmuşlar” silsilələrindən rəsmləri, eyni zamanda, avtoportretləri yer alıb.

Sərginin təşkili ərəfəsində Bernar Buffenin əsərlərinin reproduksiyasından ibarət kataloq nəşr olunub. Kataloqda ön sözün müəllifi Leyla Əliyevadır.

Leyla Əliyeva ön sözdə Bernar Buffenin əsərlərinin Bakıya gətirilməsindən və dünyanın istedadlı memarlarından olan Zaha Hadid tərəfindən layihələndirilən Heydər Əliyev Mərkəzində sərgilənməsindən məmnunluq duyduğunu qeyd edib.

Sərgisi 2015-ci il yanvarın 15-dək davam edəcək.

Bernar Buffe 1928-ci il iyunun 10-da Parisdə anadan olub. Rəssam melanxolik, monoxrom əsərləri ilə məşhurlaşıb. О, “Fəxri Legion”, “İncəsənət və Ədəbiyyat” ordenlərinin kavaleri olub. 1973-cü ildə Yaponiyada Bernar Buffe Muzeyi yaradılıb. Parkinson xəstəliyindən əziyyət çəkən rəssam 1999-cu ildə 71 yaşında intihar edib.