Heydər Əliyev Fondunun vitse-prezidenti Leyla Əliyevanın təşəbbüsü ilə Azərbaycan Gəncləri Günündə Rusiyanın Azərbaycanlı Gənclər Birliyinin (RAGB) İvanovo şəhərində IV Qış Liderlik Məktəbi açılıb. Tədbir Ümumrusiya Azərbaycanlılar Konqresinin (ÜAK) İvanovo regional bölməsinin təşkilati dəstəyi ilə keçirilir.

Məktəbə gənc, perspektivli, istedadlı və yaradıcı insanlar toplaşıblar. Onlar 5 gün ərzində tematik treninqlərdə, ustad dərslərində, yarmarka-təqdimatlarda, habelə işgüzar və idman oyunlarında iştirak edəcəklər.

İvanovo vilayətinin Daxili Siyasət Departamentinin rəisi Yevgeni Nesterov, İvanovo Vilayət Duması sədrinin birinci müavini, Rusiya Xalqlar Assambleyasının regional bölməsinin sədri Anatoli Burov, İvanovo Şəhər Dumasının sədri Aleksandr Kuzmiçov, İvanovo Şəhər Administrasiyası başçısının müavini Sergey Zolkin, RAGB-nin idarə heyətinin üzvü Emin Hacıyev tədbirdə çıxış ediblər.

Məktəbin təntənəli açılış mərasimi çərçivəsində RAGB-nin regional bölməsinin təqdimatı da keçirilib.

Gecə RAGB regional bölməsinin və İvanovo Millətlər Evinin yaradıcı qüvvələrinin konserti ilə başa çatıb.