Şirvan

Əli Bayramlı şəhəri yerləşən bölgənin keçmişi ilə bağlı bəzi məqamlar tariximizin şanlı səhifələridir. E.ə. II və III minilliklərdən orta əsrlərə kimi Əli Bayramlı şəhərinin indiki ərazisindən keçən ən qədim karvan yolları Azərbaycanın bütün bölgələrini birləşdirirdi. Bu bölgəyə yaxın karvansaray və onlarla yaşayış məskənlərinin xarabalıqlarının hazırki dövrə qədər qalması deyilənlərə sübutdur.

Müxtəlif dövrlərdə bu ərazi Şirvanşahların, Şirvan bəylərbəyliyinin, Şamaxı xanlığının, qismən Cavad xanlığının, Şamaxı qəzasının və Cavad qəzasının tabeliyində olmuşdur.

Azərbaycandakı cırtdan feodal dövlətləri birləşdirmək, qüdrətli Azərbaycan dövləti yaratmaq üçün ilk səfəri zamanı Şah İsmayıl Xətai 1500-cü ilin II yarısında indiki Əli Bayramlının ərazisindən keçən karvan yolu ilə hərəkət edib, qışı Mahmudabad şəhərində keçirmişdir.

Şəhərdə "Şəhidlər xiyabanı", "20 Yanvar" abidəsi, "Yanar ürək" kompleksi, Sovet İttifaqı Qəhrəmanı Şirin Şükürovun abidəsi, "Qəmgin ana", "Faşizm üzərində qələbənin 55 illiyinin xatirə kompleksi" var.

Bunlardan əlavə şəhərdə olan Azərbaycan şairləri Məhəmməd Füzulinin və Səməd Vurğunun abidələri, N.Nərimanovun barelyevi, Dədə Qorqud abidə kompleksi, Tarix-Diyarşünaslıq muzeyi şəhər mədəniyyətinin canlı eksonatlarıdır.

Şirvan şəhərində «Neftçi» İdman Sağlamlıq Mərkəzinin idman kompleksi mövcuddur. Sağlamlıq Mərkəzinin iki mərtəbəli idman bazasında sərbəst güləş, boks, kikboksinq və şahmat idman növləri inkişaf etdirilir.Bundan başqa burada fiziki hazırlıq zalı və mini-futbol meydançası da fəaliyyət göstərir.Ümumilikdə burada qeyd olunan idman növləri ilə 200 nəfərdən artıq uşaq və yeniyetmə məşğul olur.

Məlumat üçün bildiririk ki, Azərbaycan Respublikası Dövlət Neft Şirkəti tərəfindən 2005-ci ildə mərkəzi şəhər stadionunun və qapalı əl oyunları idman kompleksinin tikintisinə başlanılmış və hal -hazırda tikinti işləri davam etdirilir.